26 Лістапада 2003
ВЯДОМАЯ ТЭЛЕВЯДОЎЦА ЭЛЕАНОРА ЯЗЕРСКАЯ Ў РЭАНІМАЦЫІ
Учора ўвечары яна трапіла ў 3-ці клінічны шпіталь з прабадной язвай 12-перснай кішкі, і ёй зрабілі тэрміновую апэрацыю. Як паведаміў для Радыё Свабода загадчык хірургічнага аддзяленьня 3-га шпіталю Мікалай Сівец, апэрацыя была даволі складаная, але цяпер Элеанора Язерская знаходзіцца ў адэкватным стане.
Ганна Соусь, Менск
Што да прычынаў хваробы, то Мікалай Сівец кажа, што яны могуць быць розныя, аднак найчасьцей у абвастрэньні адыгрывае ролю нэрвовы стрэс. На мінулым тыдні судовая калегія Менскага гарадзкога суду прысудзіла спагнаць на карысьць старшыні Белдзяржтэлерадыёкампаніі Ягора Рыбакова з былой тэлевядоўцы Элеаноры Язерскай 3 мільёны рублёў (гэта амаль 1,5 тысячы даляраў). Пасьля звальненьня зь Белдзяржтэлерадыёкампаніі спадарыня Язерская жыве на пэнсію.
У кастрычніку 2001 году ў інтэрвію журналістцы газэты “Народная воля” Марыне Коктыш Элеанора Язерская казала, што Ягор Рыбакоў ператварыў Беларускае тэлебачаньне ў руіны, а таксама нібыта спрычыніўся да сьмерці некаторых супрацоўнікаў тэлекампаніі. За гэтую публікацыю судовая калегія Менскага гарадзкога суду прыняла рашэньне спагнаць з “Народнай волі” 50 мільёнаў рублёў, а з Марыны Коктыш і Элеаноры Язерскай па 3 мільёны рублёў кампэнсацыі за абразу гонару, годнасьці й дзелавой рэпутацыіі Ягора Рыбакова.
http://www.svaboda.org/news/articles/2003/11/20031126130718.asp
=================
// фото:
http://minsk.kp.ru/2003/11/19/doc8736/
|